………………
မိုးကလည်း တဖွဲဖွဲကျနေတဲ့ အချိန်မှာပဲ ကရင်နီရိုးရာ ဓလေ့ထုံးတမ်းစဉ်လာကို အများအားဖြင့် လိုက်နာကျင့်သုံးတဲ့ အများက ဒေါခရောအော လို့ခေါ်တဲ့ ရပ်ကွက် ကိုရောက်သွားခဲ့ပါတယ်။
အိမ်တအိမ်ရှေ့ ၀ါးရံတာမှာတော့ အသက် အသက် ၅၀ အရွယ် အဖိုး ဘို့ရယ်က ထိုင်နေပါတယ်။
သူက ကရင်နီလူမျိုးတွေရဲ့ အီရိုး ခေါ် သီချင်းကြီး တေးဟာ ကဗျာလင်္ကာလို လေးနက်တည်ကြည်တဲ့ စကားလုံးတွေနဲ့ စုပေါင်းပြီး ဖွဲ့နွဲ့သီဆို၊ ရွတ်ဆိုထားတာ ဖြစ်တယ်လို့ ကရင်နီဘာသာနဲ့ ပြောပါတယ်။
“သူတို့မသိဘူး အခုခေတ်ကလေးတွေက။ ရှေ့ဆိုရိုးစကားနဲ့ပတ်သက်ပြီး ကောင်းကောင်းမသိကြဘူး။ ရှေ့ဆိုရိုးစကားနဲ့ ပတ်သက်ပြီး ဘယ်လိုအဓိပ္ပါယ် ရှိလဲ၊ ဘယ်လိုဆင်းသက်လာတယ်ဆိုတာကို ကျနော်တို့က ပြောပြမှ သူတို့သိတယ်”
အီရိုးကို ရွတ်ဆိုရာမှာ နည်းအမျိုးမျိုးရှိပါတယ်။ ကိုယ့်တိုင်းပြည်ကို ပြန်ပြီး ချီးမွမ်းတာတွေ၊ ကိုယ့်ရပ်ရွာကို ချီးမွမ်းတာတွေ ၊ အပျိုလူပျိုတွေအတွက်ရော၊ ဧည့်သည် တွေအတွက် အမျိုးမျိုးတွေ ရှိပါတယ်။ ကဲ့ရဲ့ တဲ့ သီချင်းကြီး ရှိသလို ချီးမွမ်းတဲ့ သီချင်းကြီးလည်း ရှိပါတယ်။
ကိုယ့်ရဲ့ ဇာတိမြေကို ချီးမွမ်းပြီး တပါးနိုင်ငံ မှာ လာရောက်ခိုလှုံရတဲ့ အကြောင်းကို အဖွားဌေးမိုက အခုလို သီဆိုပေးသွား ပါတယ်။
“အဓိပ္ပါယ်ကတော့ ကျမတို့တိုင်းပြည်မှာ နေရတာ အရမ်းပျော်စရာကောင်းပါတယ်။ နအဖ မကောင်းတဲ့ အတွက်ကြောင့် မလို့ တပါးသောနိုင်ငံမှာ လာရောက်ခိုလှုံ နေရတယ်။ လုပ်ပိုင်ခွင့် တွေ မရှိဘူး ဟိုမလုပ်ရ ဒီမလုပ်ရ ပိတ်ပင် ခံရတာ ကို မပျော်ရွှင်ဘူး၊ ကျမတို့ ကရင်နီပြည် မှာ ပျော်ရွှင်မှုတွေ စွန့်ပစ်ပြီး သူများနိုင်ငံမှာ လာရောက်ခိုလုံ နေရပါတယ်”
တချို့ အီရိုးတွေက အရင်ကတည်းက ရှိပြီးသားဖြစ်သလို တချို့ အီရိုးက လက်ရှိဖြစ်ပျက်နေတဲ့ အကြောင်းအရာကို ယူပြီး ရွတ်ဆိုကြတာ ဖြစ်ပါတယ်။
အခုလို ပွဲတော်တွေမှာ အီရိုးကို ထည့်သွင်းပြိုင်ဆိုင်ခိုင်းတဲ့ အတွက် ဒီအကြောင်းတွေကို လေ့လာ သင်ယူနိုင်ခဲ့တယ်လို့ လူငယ်တယောက်ဖြစ်တဲ့ ဆော်ရယ်က ကရင်နီဘာသာနဲ့ ပြောသွားပါတယ်။
“ကျနော်အတွက် အရမ်းကောင်းတယ်။ ယဉ်ကျေးမှုတခုပေါ့ အမွေအနှစ်ပေါ့၊ ငယ်ငယ်တုန်းက ဆိုရင် ပွဲလမ်းသဘင်မှာ ဆိုရင် နားထောင်ဖူးတယ်။ ဘာကြောင့် ရွှတ်ဆိုရတာလဲ ဆိုတာကို မသိဘူး ဒါပေမယ့် အခုတော့ နည်းနည်းလေး တတ်လာပြီ အဓိပ္ပါယ် ကတော့ အကုန်လုံး မသိဘူး ဒါပေမယ့် ခန့်မှန်းတော့ ရပြီ”
ဒီအီရိုးအကြောင်းနဲ့ သီဆိုပုံတွေကို ပြည်တွင်းရော ပြည်ပက ကရင်နီလူမျိုးတွေက မှတ်တမ်းအနေနဲ့ ဗွီဒီယိုရိုက်ထားခြင်း၊ စာအုပ်စာပေမှာ ရေးမှတ်ထားခြင်းမရှိဘူးဆိုရင် တဖြည်းဖြည်း ပျောက်ကွယ် ပြတ်တောက်သွားနိုင်တယ်လို့ အဖိုးဘို့ရယ်က ပြောသွားပါတယ်ရှင်။
0 comments: